Með axlabönd og belti

Ingibjörg er heldur betur að baktryggja sig núna. Miðað við fyrri yfirlýsingar Ingibjargar þá voru stjórnarslit boðuð ef Sjálfstæðisflokkurin myndi ekki taka U-beygju í afstöðu sinni gagnvart Evrópusambandsaðild.

Nú eru settar fram mildari kröfur og þar með opnað á Framsóknarleiðina þ.e.a.s. að láta kjósa um það hvort fara eigi í aðildarviðræður. Þar með jók hún möguleikana á áframhaldandi stjórnarsamstarfi til muna........og það gengur víst framar einhverju "prinsippi" þar á bæ. 

Alþingiskosningar samhliða

Bara þeir þrír?

Einhversstaðar þarf að byrja en mér finnst frekar þunnt hjá Röddum fólksins að tiltaka bara þessa þrjá einstaklinga. Frekar ættu þau að fara eftir tilmælum ráðamanna, sleppa að persónugera vandann, og krefjast afsagnar ríkisstjórnarinnar og fylgifiska þeirra.

Þessir einstaklingar sitja jú í umboði hvers annars, en ekki beint í umboði þjóðarinnar.

Þjóðin kýs sér fulltrúa á þing og þeir fulltrúar koma sér saman um val á ráðherrum og öðrum fylgifiskum í krafti meirihluta á þingi.

Það væri kannski snjall leikur að krefja aðra í ríkisstjórnarflokkunum um að þessir þrír segi af sér. Fyrir ekki svo mörgum misserum þá hefði líklega heyrst mikið í Samfylkingarfólki ef upp hefðu komið svipaðar aðstæður. Nú heyrist ekki mikið af þeim bænum og fagurgalar sem sungu svo hátt um lýðræði og réttlæti hafa tapað söngröddinni eða einfaldlega fundið sér annað lag til að syngja, Samtryggingarsönginn.  

Ég held að önnur eins sinnaskipti í íslenskri stjórnmálasögu séu vandfundin. Fyrir hefur komið að einstaklingar hafa skipt um skoðun og skipt um flokka en að heill flokkur skuli snúast svona á punktinum er með algjörum ólíkindum og ætti að setja sérstaka rannsóknarnefnd í að skoða það mál sérstaklega.

Að lokum vil ég taka fram að mótmæli sem þessi eru til fyrirmyndar, þarna er sett fram málefnalegt plagg og afhent viðkomandi aðila í friði og rósemd. Í mínum augum eru það mótmæli sem virka. 

Krefjast afsagnar Árna Mathiesen

Líklegur eigandi fundinn!

Rannsóknin á hver eigi þennan sjóð gæti þróast á þessa leið:

1. Búa til lista yfir þá aðila sem lýst hafa yfir miklu ástfóstri við gjaldmiðil okkar.

2. Lista upp alla íbúa í Skerjó.

3. Keyra þessa tvo lista saman til að sjá hvaða nöfn eru á báðum listum.

Svar: Davíð Oddson........

ps. rannsóknin gæti einnig leitt í ljós ástæðuna fyrir því að Davíð var að fóðra kettina.......þeir hafa verið að snuðra í kringum felustaðinn og hann viljað beina athyglinni annað........eitruð leikflétta hönnuð af Davíð......betur þekkt sem "smörklípuaðferðin"

Fundu aura á Skildinganesi

Var það kossinn sem slökkti neistann?

Eftirfarandi setning úr ályktun Samfylkingarfólks á Skaganum æpir á mann að það sem lagt var upp með við stofnun Samfylkingarinnar hefur algerlega mistekist:

„Samfylkingin var stofnuð til að vera boðberi nýrra og opnari stjórnarhátta."

Flokkurinn sem kom kröftuglega fyrir sjónir, talaði um jöfnuð og opna stjórnsýslu, málsvari lýðræðislegra stjórnunarhátta, boðaði samræðustjórnmál og lofaði að hlusta á þjóðina.......síðan kysstust þau svo fallega Ingibjörg og Geir......og þá var allt búið.......

Myndi jafngilda stjórnarslitum

Tekjuáætlun ellilífeyrisþega?

Nú er auglýst í gríð og erg lokadagsetning ellilýfeyrisþega til að senda inn tekjuáætlun.

Þetta kemur ansi spánskt fyrir sjónir í ljósi eins aðalbaráttumáls Samfylkingarinar um langa hríð að afnema tekjutengingar á lífeyrisgreiðslum.

Ég man þá tíð að Samfylkingarfólk með Helga Hjörvar í fararbroddi gekk fram af miklum þunga í þessum málum og gagnrýndi nær stanslaust þessa aðferð og sérstaklega þegar kom að því að ellilíferisþegar sem sendu inn of lága áætlun þurftu að endurgreiða. Ekki vantaði stóryrðin og yfirlýsingarnar þá.

Ríkisstjórnartíð Samfylkingarinnar ætlar að vera ein hörmungarsaga. Það liggur við að maður athugi hvort þeir hafi skipt um kennitölu að afloknum kosningunum 2007 þvílík stefnubreyting hefur átt sér stað þar á bæ.

Steingrímur J. í Íslandi í dag

Fyrri hlutinn af viðtalinu við Steingrím J. var alger hörmung. Þó að ýmis áherslumunur sé á skoðunum okkar Steingríms hef ég fullan áhuga á að heyra það sem hefur fram að færa. Það kom illa fram í þessu viðtali. Spyrillinn alveg gjörsamlega úti á túni og tók upp einhverja útúrsnúningaspyrilmennsku sem því miður sést allt of oft.

Ábyrgð fjölmiðla er mikil og því miður standa þeir ekki undir þeirri ábyrgð og hafa ekki gert lengi.

Vonandi eigum við eftir að sjá sterka fjölmiðla koma upp og breytingar þar til hins betra.

Algerlega marklaust!

Skoðanakannanir á þessum tímapunkti eru algerlega óraunhæfar og marklausar.

Ástæðan er sú undirliggjandi samfélagsbylting sem liggur í loftinu um þessar mundir. Það flokkakerfi sem nú er við lýði á eftir að gjörbreytast. Stórar fylkingar eiga eftir að skipta um lið og möguleiki er á að nýir flokkar líti dagsins ljós eða klofningsframboð myndist.

Skoðun mín er sú að ef kosið verður næsta vor (vonandi) þá sigrar það framboð sem teflir djarft. Ný andlit, nýjar hugmyndir og ný samfélagssýn.

Í þeim breytingum öllum verður VG vandi á höndum. Eiga þeir að tefla fram sama liðinu? Ef ekki hvaða afleiðingar hefur það? Verður Steingrímur áfram formaður? Hvaða breytingar eiga þeir að gera á stefnunni? Engar?

Ég spái því að VG eigi eftir að sitja með Svarta-Pétur sem þeim tekst illa að losna við.

VG stærsti flokkurinn

Ég vil sækjast eftir tækifærum!

Það er rétt að vandamálum fylgja tækifæri. Óskastaðan er að í næstu kosningum (vonandi ekki seinna en næsta vor) velji íslendingar sér jákvætt, bjartsýnt, heiðarlegt og framsækið fólk sem af dug og elju þjappar fólkinu saman að baki sér til góðra verka.

Þangað til sitjum við uppi með það sem við völdum síðast.....

Íslendingar einblína á vandann

Þar höfum við það!

Nú býst ég við að þjóðin sofi róleg þegar "huldumennirnir" svokölluðu eru komnir fram í dagsljósið.

En hvar er Jón Ásgeir á þessum lista? Ætli hann stefni Agnesi Braga eins og hann hótaði?

Þessi frétt er áfellisdómur fyrir fjölmiðla og þá sérstaklega Agnesi Braga sem hélt sig hafa skúbbað svo feitt með sína rannsóknarblaðamennsku. Það virðist vera að Agnes hafi farið jafn frjálslega með staðreyndir og farið hefur verið með fjármuni í þessu STÍM máli öllu saman.

Yfirlýsing frá Stími

Ætli lýsingarorðið "umfangsmiklar" sjáist aftur?

Þegar ríkisstjórnin kom fram með tillögur til handa heimilum og fjölskyldum nú nýverið þá kynntu þau tillögurnar sem "umfangsmikar". Fréttastofurnar átu þetta upp sérstaklega þó RÚV sem sögðu landsmönnum ítrekað frá því að ríkisstjórnin hefði lagt fram "umfangsmiklar tillögur".

Ekki get ég séð að þessar tillögur eigi eftir að skipta sköpum eða létta fyrir fólki á þann hátt sem ég legg skilning í orðið umfangsmikið.......eða öllu heldur lagði skilning í orðið umfangsmikið áður en ríkisstjórn Íslands endurskilgreindi orðið samviskusamlega fyrir mér.

Nú er verið að byggja upp spennu hjá þjóðinni og skal hún bíða fram á mánudag eftir að haldin verði blaðamannafundur um tillögur til handa fyrirtækjum.....með einhverju stóryrtu lýsingarorði í fararbroddi.

Ætli tillögurnar séu ekki bara tilbúnar......þau gefa sér síðan helgina til að finna rétta lýsingarorðið.

Einhverjar hugmyndir?

Aðgerðir kynntar eftir helgi