Neyðarlegar auglýsingar

Fyrir skaupið í gær birtist auglýsing þegar Ellý (fv. þula) birtist á skjánum og var að auglýsa einhvern geisladisk. Eftirvæntingin rauk upp í sófanum og allir á heimilinu héldu að Ellý væri að fara að telja í skaupið. Svo nokkrum auglýsingum síðar birtist önnur fyrrverandi þula og var að auglýsa eitthvað sem ég man ekki hvað var enda fór svolítill kjánahrollur um mig og fleiri..........Hræðilegt þegar sama hugmyndin er notuð tvisvar í sama auglýsingatímanum.

Þula númer þrjú sem birtist á skjánum hefði hreinlega slegið sjálfu skaupinu við ef um auglýsingu hefði verið að ræða en hún slapp með skrekkinn.....

Skaupið

Það er enginn maður með mönnum hér á blogginu nema að segja eitt eða fleiri orð um skaupið. Skaupið skoraði ekki hátt hjá mér og lítið um hlátrasköll á meðan á því stóð. Það má segja að það hafi verið efnilegt á köflum en ekki náð alveg að hitta naglann á höfuðið. Þetta var svona meðalskaup.

Mest auglýsta auglýsing frá upphafi "pissupásan" var mjög vel gerð og eiga þeir sem hana unnu heiður skilið. Hún hafði ekki áhrif á heildarmat mitt á skaupinu

Gleðilegt ár!

Ég óska öllum gleðilegs árs og þakka fyrir það liðna. Árið sem var að líða var mjög viðburðaríkt hjá mér eins og mörgum öðrum. Hæst bar kosningabaráttan og kosningarnar i vor. Það var mjög lærdómsríkt að taka þátt í þeirri baráttu. Að fá að kynnast svona mikið af fólki og setja sig inn í málefni kjördæmisins og samfélagsins var mikil lífsreynsla sem á eftir að skila sér í framtíðinni í aukinni víðsýni og þekkingu. Ég þakka öllum þeim sem lögðu mér og okkur lið í baráttunni og þakka þeim fjöldamörgu vinum sem ég eignaðist víðsvegar um kjördæmið fyrir ánægjulega samveru á árinu, vonandi verða þær sem flestar í framtíðinni. 

Setti á mig kynjagleraugun þegar ég las fyrirsögnina

Ef ég væri að reifa þennan dóm þá myndi ég passa mig sérstaklega að minnast ekki á kyn einstaklingsins í fyrirsögninni því að það skiptir ekki máli. Eða hefði málið farið öðruvísi ef um hefði verið að ræða strák?

Með þessum hætti er verið að draga athyglina frá því sem raunverulega skiptir máli þ.e.a.s. hvort þær aðstæður sem voru fyrir hendi hafi réttlætt þær aðgerðir sem gripið var til.

Bærinn gat neitað stúlku um skólavist

Nú tek ég aftur upp þráðinn

Eftir gott sumarfrí frá blogginu þíðir lítið annað en að hefjast handa aftur. Nú fer að færast líf í stjórnmálin og hveitibrauðsdögum hinnar nýju ríkisstjórnar er að ljúka. Það litla sem hefur gerst í stjórnmálunum í sumar sýnir greinilega að Samfylkingin á í basli með breytinguna að fara úr andstöðu yfir í stjórn. Upphæðir sem áður þóttu of litlar eru nú helst til rausnarlegar...... aðgerðir sem áður þóttu ganga of skammt eru nú mikil búbót fyrir landann.... óánægjuraddirnar sem átti að kveða niður með einföldum og skjótvirkum aðgerðum þagna ekki.... það sem áður var gagnrýnt og fordæmt er nú réttlætt.

Sannast hið fornkveðna... auðveldara er um að tala en í að komast.

"Frístundakort í salt um sinn"

Svo hljóðar frétt inni á visi.is.....mér féllust hendur þegar ég las fyrirsögnina og hugsaði hvað væri í gangi. Málefnið kynnt með pompi og pragt í vikunni og svo kemur helgin og þá allt sett í bakgírinn. En ekki er allt sem sýnist þegar fjölmiðlar eru annars vegar og fréttin ekki í neinu samræmi við fyrirsögnina. Fréttin snýst um að VG í borgarstjórn var á móti því að kortin væru veitt.

Það er alveg með óíkindum hvað fjölmiðlar geta verið óvandvirkir í framsetningu sinni og er þetta dæmi um slíkt. Oftar en ekki þegar búið er að lesa frétt þarf maður að fara að skoða sjálfur á netinu hvað hið sanna er í málinu og þá kemur mjög oft allt anað í ljós en stendur í fréttinni.

Maður spyr sig.....hvað gengur þeim til...

Eru umræðurnar um hvalveiðar það sem koma skal hjá ríkisstjórninni?

Einn ráðherran er með, annar á móti, þriðji með og fjórði tvístígandi......og svo frv. Sama gildir um þingflokkana, þar eru skiptar skoðanir og mismunandi loforð voru gefin í kosningabaráttunni.

Þetta verður spennandi samstarf og greinilega ólíkt frá samstarfi X-B og X-D að því leiti að menn hlaupa nú í fjölmiðla fyrst og ræða málin síðan innan stjórnarflokkanna.

Áskorun til "veiðimanna"

Sá í fréttunum á RÚV áðan hvernig tófan er að gera usla í sauðburði og fuglalífi. Ég er nú ekki byssuglaður maður enda mikill dýravinur. Samt ætla ég að hvetja byssuglaða til þess að einbeita sér í auknum mæli að minka- og refastofninum og láta blessaða rjúpuna eiga sig.

Enda þarf mun meiri veiðikunnáttu og fagmennsku til að eltast við refinn og minkinn en að skjóta spaka rjúpuna oft af fárra metra færi.

Á að einkavæða Landsvirkjun?

"Tímabært er að leysa úr læðingi krafta einkaframtaksins svo að íslensk sérþekking og hugvit fái notið sín til fulls í útrás orkufyrirtækjana"

Þessi setning í stjórnarsáttmálanum er eins og snýtt út úr nefinu á íhaldinu. Þetta er síðan á höndum Össurar að koma orkunni í hendur einkageirans.

Það væri nú eftir öðru eftir öll stóru orðin hjá Samfylkingunni þegar hún kepptist við að bera það upp á Framsóknarflokkinn að hann vildi selja Landsvirkjun að það verði svo Samfylkingin sjálf sem framkvæmi það.

Margur heldur mig sig.....

Þjórsárver eða ekki Þjórsárver

Ef ætlun hinnar nýju ríkisstjórnar er að klára deilumál í sambandi við Norðlingaölduveitu og Þjórsárver í eitt skipti fyrir öll þá hefði verið hægt að orða það með mun skýrari hætti í stjórnarsáttmálanum. T.d. Hætt verði við gerð Norðlingaölduveitu.

Setningin upp úr stjórnarsáttmálanum er hinsvegar eftirfarandi:

"Stækkun friðlandsins í þjórsárverum verði tryggt þannig að það nái yfir hið sérstaka votlendi hveranna"

Loðnara getur það ekki verið og einsýnt er að hin nýja ríkisstjórn vill halda öllu opnu í virkjanamálum sem og öðru. Það er mikið talað um það hjá stjórnarliðum að nýja ríkisstjórnin hafi burði og kjark til að koma málum á dagskrá.  Svona loðin stefna er ekki til merkis um mikinn kjark. Það hefði verið nær að koma skýrt fram og segja bara Þjórsárver eða ekki Þjórsárver.